Karemlees.com ..منتدى عـراقي

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
Karemlees.com ..منتدى عـراقي

نذكركم بأن المقالات والردود لاتعبر عن رأي المنتدى


    صوّتْ للحزبْ يعراگي ما تندم // داود أمين

    الصياد
    الصياد
    نجم كرمليس.كوم
    نجم كرمليس.كوم


    عدد المساهمات : 78
    تاريخ التسجيل : 12/11/2009

    صوّتْ للحزبْ يعراگي ما تندم // داود أمين Empty صوّتْ للحزبْ يعراگي ما تندم // داود أمين

    مُساهمة من طرف الصياد 6/3/2010, 18:37

    صوّتْ للحزبْ يعراگي ما تندم

    داود أمين

    صوّتْ للحزب يعراگي ما تندم
    صوّت للشيوعي، وحشد وحشمْ

    صوّت للحزب يعراگي ما تندمْ

    صوّت للنشامه ، للشيوعيين
    ملح الگاع ذوله، وجذر هذا الطينْ
    أهل نخوه وحميّه ومرجله وطيبين
    تنخاهمْ ! تشوف وياك خال وعمْ

    صوّت للحزب يعراگي ما تندمْ

    صوّت للخلايا الأولى بالعشرين
    لغالي وضاحي والخياط والطيبينْ
    لإبن كسار، صوّتْ للفدائيين
    للعود الطري وكيف أزهر وبرعمْ

    صوّت لإتحاد الشعب ما تندمْ

    صوّت ياعراقي لفهد ولحازمْ
    لحسين الرضي لإبن الشعب صارمْ
    فده روحه لقضيته، وحزبه ظل سالمْ
    حزب مامش مثيله بكثر نزف الدمْ

    صوّت للحزب يعراگي ما تندمْ

    صوّت ياعراقي لنكرة السلمانْ
    لسجن الكوت..حله. ومنفى البجصانْ
    وإسألها الصمد بيها، بشر يو جان؟
    زلم خشنين معدنهم أصيلْ وصمْ

    صوّت للحزب يعراگي ما تندم

    لقطار الموت صوّتْ، للأبطال البيه
    وحط بيرغ عليه وشموع ضوّي إعليهْ
    للسايق النشمي، مجّده وحييه
    وحيي أهل السماوه ، والمثل يِلهِمْ

    صوّت للحزب يعراگي ما تندمْ

    صوّت لآل إزيرجْ للركابيين
    للسعدون صوّت للسعيديينْ
    للسودان صوتك ، للجنابيينْ
    لشمر ولأسد، وبزبيد نتحزمْ

    صوّت للحزب يعراگي ما تندمْ

    صوّتْ للسواعد، للتميميينْ
    وبني فتله وعبوده والهلاليينْ
    وحيي الياسري والزيدي والطيبين
    عشايرنه الأصيله هيبه مِن تلتمْ

    صوّت لإتحاد الشعب ما تندمْ

    للوثبه المجيدة صوّت بكانونْ
    لبهيجه والجسر، لأحرار ينذبحونْ
    لدم جعفر وأخوته السال مثل عيونْ
    صار الدم وكتها بصوت يتكلمْ

    صوّت للحزب يعراگي ما تندمْ

    صوّت هربجي كرد وعرب إخوانْ
    من شط العرب ، لجبال كردستانْ
    خوتنه حقيقه، مو دغش ودنانْ
    وخل يخشه اليضدنه، بغيضه يتبلعمْ

    صوّت لإتحاد الشعب ما تندمْ

    صوّت ياعراقي للملح والزاد
    إللمة أصدقاء وطيبه خل تنعادْ
    لجلمة (ياحبيبي)و(مرحبه)و(لك داد)
    وجاي وكعده حلوه بكهوه لو مطعمْ

    صوّت للحزب يعراگي ما تندمْ

    صوّت يا عراقي للشعر والفنْ
    لللحن الجميل بعود لو دندنْ
    وصوت محمداوي إبليل من ينجنْ
    ومطبك وي ربابه وخشبه وتقسِمْ

    صوّت لإتحاد الشعب ما تندمْ

    صوّت ياعراقي لكامل إبن شياعْ
    لمثقف ما عِرَض صوته بمزادْ وباعْ
    مثقف جان مشروعه الوطن والكاع
    حِزَرْ وأدرك مصيره وجِرع طعم السمْ

    صوّت للحزب يعراگي ما تندمْ

    صوّت للمناجل للفلح لسعودْ
    لصويحب النشمي وخلي ذكره يعودْ
    لإبو مرداس صوّت كله عدنه إردود
    على دربك يطعمه ، ومنه نتعلمْ

    صوّت للحزب يعراگي ما تندمْ

    لجمال الحيدري صوّت ودم ستار
    صوّت للعبلي وشاكر وصبارْ
    لإبن شلتاغ صوتك والشهم جبارْ
    ما بطّل نزفنه، وبحر صار الدمْ

    صوّت لإتحاد الشعب ما تندمْ

    صوّت ياعراقي لتوما إبن توماسْ
    لجيفارا العراق البيه رفعنه الراسْ
    أرادة من حديد، وكلب مثل الماسْ
    دمعته بطرف عينه ورقته بلسمْ

    صوّت للحزب يعراگي ما تندمْ

    الزكي خيري إنطي صوتك فكره جان زناد
    يجدح ما يبطل والعقل وقّادْ
    وكلما زاد عمره، همته تزداد
    إبو يحيى وحسافه إيموت هالضيغمْ

    صوّت لإتحاد الشعب ما تندمْ

    صوّت ياعراقي ليوسف إسطيفان
    لقديس الحزب للنشمي للإنسان
    لقائد عسكري ما ضعف يوم ولان
    مصنع للأبطال القوش إله ومنجمْ

    صوّت للحزب يعراگي ما تندمْ

    لمحمد بشيشي ، للطبيب البار
    للعقل الجبير ، ورقة الأوتار
    لمفرزة الطريق لمفخرة أنصار
    صوّت للجرى ويْ دجلهْ منهمْ دمْ

    صوّت للحزب يعراگي ما تندمْ

    صوّت لإبو كاطع للبطل شمرانْ
    حجاها إبكل صراحه، وما خشى السلطانْ
    حط دمه إعله جفه، وما بطله لسانْ
    صاح بصوت واضح، وأبد ما تلعثمْ

    صوّت لإتحاد الشعب ما تندمْ

    لإبو كاطع الصوت إنطوه للفلاحْ
    للي إبكل صراحه كال ما مرتاحْ
    حط بيد الشعب، حط بوصله ومفتاحْ
    كال إحجي الصراحه تعيش تتكرمْ

    صوّت للحزب يعراگي ما تندمْ

    صوّت لإبو كريم والبطل هندالْ
    وأركاب التفك من تشع بيد إرجالْ
    يا محله الشباب أنصار فوك إجبالْ
    مجدهم زاهي والتاريخ يتكلم ْ

    صوّت للحزب يعراگي ما تندم

    لهادي صالح إنطي الصوت للطبّاعْ
    للخاض التحدي، وما خشى وإرتاعْ
    لمح موته وتحدى، وفات فوت سباعْ
    من نص النقابه شخّصْ وعَلّمْ

    صوّت للحزبْ يعراگي ما تندمْ

    صوّت لإبن ماضي ولحسن مرجانْ
    لنجية ولهديه وصاحب وشرهانْ
    وحيي أولاد طارش بالمجد عنوانْ
    بدمهم راية الشجعان تتسلمْ

    صوّت لإتحاد الشعب ما تندمْ

    صوّت ياعراقي لسحر ولأنسامْ
    لأم ذكرى الشهيدة، صوّت لأحلامْ
    لفريال ورضيه وأم علي وأنعامْ
    شهادتهن كرامه ، وللمجد سُلمْ

    صوّت للحزب يعراگي ما تندمْ

    صوّت ياعراقي للبطل سعدونْ
    للغالي العزيز البلحزب مفتونْ
    لليمطر محبه وبالوفه معجونْ
    نهل معنى الشهاده بكربلا تعلمْ

    صوّت للحزب يعراگي ما تندمْ

    صوّت ياعراقي لقائمة وضاحْ
    للدم النفيس الفاض عطر وفاحْ
    لرجل يقطر شهامه ومرجله وقداحْ
    رجل يندر مثيله والوكت أظلمْ

    صوّت لإتحاد الشعب ما تندمْ

    صوّت لإتحاد الشعب للعمالْ
    للفلح النشامى لقائمة هندالْ
    للطلاب صوّت للشبيبه أبطال
    للمرأة الأصيله وطفل يتبسمْ

    صوّت للحزب يعراگي ما تندمْ

    صوّت للعراق موحد ومحروسْ
    بقائمة الحزب مرفوع فوك الروسْ
    مامش طائفيه ولا عرج مدسوسْ
    بتراب الوطن مو غيره نتيممْ

    صوّت للحزب يعراگي ما تندمْ

    صوّت للسريع إلحسن للمقدامْ
    ولحفنة جنود أبطال رفعة هامْ
    واحدهم أسد ساهر أبد ما نامْ
    نذر دمه لقضيته ورعد لو دمدمْ

    صوّت لإتحاد الشعب ما تندمْ

    صوّت لأمنه المكبعه وتذب منشورْ
    وتوزع الجريده وترش عطر ونورْ
    الحايط كام يحجي، كشفت المستورْ
    الشعار اللي نريده فوكه يتبسمْ

    صوّت للحزب يعراگي ما تندمْ

    صوّت لإتحاد الشعب للأحرارْ
    لسِفر من الشهادة وتضحيه وإيثارْ
    للإيد النظيفه المادنت للعارْ
    نهلنه من النزاهة عسل مو علكمْ

    صوّت لإتحاد الشعب ما تندمْ

    مسلم وي مسيحي وعرب ويَ أكرادْ
    صبي بصف يزيدي وبصره يم بغدادْ
    نفس يصعد الزاخو وبالمِجَر ينعاد
    وحدتنه حديد ، وأبد ما نُهزمْ

    صوّت لإتحاد الشعب ما تندمْ

      الوقت/التاريخ الآن هو 28/3/2024, 10:25